فلسفة ايڤ ❤.. ايش يعني الإلهام ؟

السلام عليكم ورحمة الله وبركاتة

كيف حالكم .. واعتذر على اني انقطعت فترة عن التدوين بس ماعرفت ارتب

وقتي صح وانضغطت كثير ، ندخل في الموضوع على طول ❤❤

ايش يعني الإلهام ، وكيف الهم نفسي ، وكل شي عن الالهام حقولوا هنا ( حتبدا ايڤ تتفلسف ) ..

* كل شي حقولوا هنا مجرد فلسفة او بمعنى ثاني من عقلي وراسي ومفهومي :

الإلهام من فهومي هو اني اشوف شي او اقرا في حاجه وتجيني افكار او ابدا اقول هذا حسيت انو يناسبني و اجلس مثلا اقرا للكاتبة فلانه و اشوف اخر اخبار الممثلة او الشاعره او او او واحس انو هما مصدر الافكار و التنبؤات اللي بتجيني !

ممكن الإلهام مايجي عن طريق اشخاص ترى الإلهام يجي من كل شي في الحياة كل شي !

كلمات ، صور ، كتابات ، اشخاص ، جمادات ، لوحات كل حاجة ممكن تكون مصدر إلهام لنا ..

اعطيكم أفكار ممكن تخليكي تبدأي تشعري بهذا الالهام :

مكتبك .. حطي فيها لوحات واكتبي فيها اقتباسات تعجبك و قريبة منك

حطي صور ناس تحبيهم ويعجبك شكلهم يعني ممكن عارضات شاعرات فنانات اي شي ..

حطي ورد حطي تحف حطي عبارات لنفسك تقرأيها كل يوم ..

كمان هذي العبارات الإيجابية تغير ترى في يومك كله ، وممكن تعطيكي افكار واشياء وهذا اسمه إلهام

طيب نعطي امثلة للي مايعرف متى نحتاج الإلهام ..

مثلا حابة تأثثي بيت اكيد قبل ماتطلعي السوق وقبل ماتبدأي اي شي حتفكري انتي ايش تبغي بالضبط ؟

هنا نحتاج إلهام نحتاج افكار تساعدنا في اختيار اثاث البيت ، اللي مفروض نسوي تفتحي النت وتبدأي تبحثي صح ؟

ايوه صح بس انتي ممكن تسوي نسخ لصق للصوره اللي عجبتك في بيتك ايش فايده الالهام هنا ؟

انتي مفروض تجمعي صور تحطيها قدامك تبدأي تشوفيها كل يوم وتبدأي تتخيلي ..

الخيال يلهم احيانا لاننا لما نغمض عيوننا ونبدأ نحلم ونتخيل تجينا اشياء وافكار مهي في الحقيقة فنكمل على المثال اللي اعطيتكم هو لما نبدأ نجمع صور ونشوفها دايما ونتخيل ونفكر ونبحث و تروحي محلات هذي كلها تعطيك الإلهام تعطيك افكار وبكذا انتي حتكوني لنفسك بصمة خاصة صح اخذتي فكره من هنا ومن هنا ومن هنا بس هذي كلها كانت مصادر إلهام ..

وانتي اللي في النهاية بحثتي وجمعتي وبدأتي تأثثي في النهاية ..

اعطيكم برنامج اشوف انه مصدر الهام جميل !

برنامج التمبلر .. اللي مستحيل يعدي يوم وما ادخله اقرا الكلام اتفرج على الصور اشوف كل شي ودائما يلهمني ويلهم غيري كثير .

طيب كمان حقولكم شخصية تلهمني واكيد شفتوا اني حاطة صورتها في حسابي على الانستقرام

وهي اودري هيبرن | ❤ Audrey hepburn

تلهمني ابتسامتها اناقتها بساطتها ..

عشان كذا حنبدأ نبحث عن مصادر الهامنا ونبدا نكٓون افكارنا وشخصيتنا الخاصة ، عشان ممكن نكون مصدر إلهام لناس غيرنا ، بس اهم شي انو مايكون معنى الإلهام عندنا هو اننا نكون نسخة طبق الاصل من مصدر الهامنا لو كانت شخصيات ..

تكون لنا شخصيتنا الخاصة افكارنا الخاصة لانو الاشخاص والاشياء الملهمة هي فقط مصادر للافكار لا اكثر ولا اقل وتساعدنا فقط .

في النهاية هذي مجرد كلام وفلسفة حبيت اقولها لان كثير مايعرفوا ايش يعني الإلهام ..

ممكن يعجبك الكلام وتبدأي تشتغلي في نفسك و ممكن مايعجبك .. عشان كذا ناخذ هذي التدوينة كانها جلسة سواليف ممكن تعجبك وممكن لا .

وشكرا لكم ❤❤.