الالوان و المجوهرات المناسبة لكل اندرتون .. How to choose clothingcolors and jewelry that flatter your skin tone

السلام عليكم كتبت هذا الموضوع في الانستقرام بس بإختصار .. هنا حكتب بالتفصيل

واحاول اشرح بطرق كثيره و نبدأ بالترتيب ❤️.

نبدأ بالاندرتون البارد / cool undertone : 

اول شيء كيف تعرفي انك صاحبة اندرتون بارد ؟ 

لون العروق او الوريد ( ازرق او بنفسجي ) . 

ثاني شيء تناسبك المجوهرات الفضية ، هي الاجمل عليكِ و تنور بشرتك اكثر ❤️.

ثالث شيء تناسبك الالوان البارده ، واكيد حتقولوا ايش يعني الالوان البارده ؟ 

هي الالوان اللي تكون قاعدتها ( اللون الازرق ) . 

طبعًا عشان نفهم اكثر اتمنى انكم تبحثوا عن الالوان ذات القاعده الزرقاء عشان تتعرفوا على الالوان اللي تناسبكم اكثر .

شوفوا الاميره كيت كيف اللون السماوي عليها جميل . 

 ايدِل حاطة لون احمر بس قاعدته زرقاء عشان كذا مناسبها ( للاسف في الصوره مو واضح عشان التأثير ) . 

حطيت امثلة بسيطة للالوان اللي ممكن تناسبكم و في الوان ودرجات كثيره جدًا ❤️. 

كذا انتهينا من صاحبات الاندرتون البارد .

الاندرتون الدافئ / Warm undertone : 

١) كسف تعرفي انك من صاحبات الاندرتون الدافئ ؟ 

لون العروق او الوريد يكون ( اخضر او زيتوني ) 

٢) تناسبك المجوهرات الذهبية اكثر من الفضية .

٣) الالوان اللي تناسبك في الملابس هي الالوان الدافئة اللي قاعدتها ( الحمراء ) 

٤) اللون الابيض يناسبكم جدًا جدًا . 

هذي بعض الامثلة على الالوان اللي تناسبكم بس زي ماقلت فوق في درجات والوان كثيره ماحقدر اقولها كلها هنا 

و كمان الفنانات اللي حطيتهم اندرتونهم دافئ فممكن تشوفوا صور اكثر عشان تعرفوا ايش الالوان اللي تناسبكم ❤️. 

واخر شيء الاندرتون المحايد / neutral undertones :

١) كيف تعرفي انك من صاحبات الاندرتون المحايد ؟ 

لون العرق او الوريد ( اما بنفسجي / ازرق و اخضر/ زيتي ) يعني مختلط بين البارد والدافئ . 

٢) تناسبك المجوهرات الفضية و الذهبية . 

٣) انتي محظوظه لان كل الالوان تناسبك بس ابحثي عن الدرجة 

اللي تنورك اكثر لان يمكن يكون عندك الاندرتون البارد اكثر من الدافئ و العكس . 

وفي النهاية الموضع يبغالها فهم وصعب انا عارفة ، بس في اليوتيوب مقاطع مره جميله وحتسهله اكثر 

ولو ماعرفتي ايش لون العروق ممكن تعرفيها بطرق ثانيه وهي ❤️: 

١) اغسلي وجهك ونظفي و لاتحطي اي شي عليه ، اربطي شعرك على ورى والبسي بلوزه بيضاء او حطي منشفه بيضاء وروحي عن ضوء طبيعي وشوفي ايش لون بشرتك مايل للاصفر يعني ( دافئ ) مايل للوردي يعني ( بارد ) . 

٢) البسي مجوهرات إما ذهبية او فضيه وشوفي ايش اللي ينور بشرتك اكثر

 ذهبي ( دافئ ) فضي ( بارد ) الاثنين نفس الشيء ( محايد ) 

٣) لما تستحمي شغلي إما مويه بارده او مويه حاره وحتلاحظي العروق طلعت وبانت اكثر كذا حتعرفي وحتسهل عليكِ 

هذي الطريقة قالتلي هيا الجميلة البلوقر اشواق ❤️. 

وان شاء الله كذا يكون اسهل وفهمتوها اكثر 

وانتظروني في تدوينة جديدة قريب ان شاء الله ❤️❤️.